Z Města/Cottbus. W lěśe 1994 w Dešnje załožone Towaristwo za serbsku rěc w cerkwi z.t. (STSRC) smějo gjarde byś, a jogo pśedsedaŕ Hartmut S. Leipner jo mimoměry zwjaselony: Srjodu wótpołudnja, 3. februara, jo nakładne awto do Města pśiwjadło paletu z dolnoserbskimi knigłami. Dłujko wócakowany nowy śišć biblije w nacasnej dolnoserbšćinje jo dojšeł.

Z tym se wudanijo wjelelětne procowanje Serbskego instituta a cłonkow STSRC. Hyšći w lěśu 1997 běšo Nowy Casnik rozpšawił z głowneje zgromaźiny Maśice Serbskeje, až „jo se w diskusiji na głownej zgromaźinje naraźiło, hyšći raz nowo wudawaś a śišćaś bibliju w dolnoserbskej rěcy, a to wobźěłane pó źinsajšnej rěcy. Měnjenja su byli wšake. Za cełu bibliju tak pšawje njejsu se mógali rozsuźiś.“ („Serbsku bibliju hyšći raz śišćaś?“, NC 14.6.1997)