Z Gołbina/Gulben. Młoźinski aktiw we aprylu jo se wótměł w Gołbinje w zgromadnem wejsnem domje, z dwěma temoma, ako njejstej mógałej rozdźělnjejšej byś. Na jaden part jo se tematizěrowało wugódnośenje jatšownego wognja na drugi part jo se wótměł workshop k temje drastwa.

Wjele młoźinskich kupkow jo pśepšosenju młoźinskego koordinatora Tobiasa Ungera slědowało. Wón jo pśigłosował akciji na Instagramje, kótaraž jo pód gronidłom „#Tradition ohne Gewalt“ běžała.

#Tradition ohne Gewalt

Wjele młodostnych jo tak swóju lutosćiwosć napśeśiwo młoźinje z Myšyna pokazało. Cuze młodostne su w nocy wót śichego pětka na sobotu nocnu wachu napadnuli. Myšynaŕ jo se pśi tom zranił a jo musał do chórownje. Ako młoźinski koordinator jo se Tobias Unger jasnje pśeśiwo kuždej namócy wugronił, až take statki njejsu špos a to z tradiciju nic wěcej cyniś njama. Južo w slědnem młoźinskem aktiwje w Dešnje jo wón młodostnych za to sensibilizěrował. Wón njejo temu we wjelikej runźe dalej rozšyrił, jo pak póbitował pótom hyšći rozgrona, jolic jo pótrjeba była.