Ze Smogorjowa/Schmogrow. Tradiciske towaristwo Smogorjow zapalujo wót lěta 1994 domorodnych a gósći ze swójimi drastwami a rejami z Błotow. Žywu tradiciju wobchowaś a wóžywiś to dawno wótzabyte – to jo była intensija, kótaraž jo cłonkow raz pógnuła k załoženju togo towaristwa. A toś tu misiju su te smogorjojske wót togo casa dopołnili. Wót 30 lět njamóžoš se wěcej pśedstajiś kulturelne žywjenje jich rodneje jsy a tek šyršeje wokolice bźeze nich. Samo daloko za granicami Bramborskeje wóni rejuju. Pśi wustupach teke w Egyptojskej a Awstriskej a w tukraju na pśikład kužde lěto na Zelenem tyźenju w Barlinju pokažu cłonki towaristwa swóje serbske drastwy a reje gósćam.