Z Grodka/Spremberg. Trjeba Grodk swójske rěcne gnězdo? Jadno pšašanje, ako jo referent Maksimilian Hasacki wót projekta ZORJA stajił na pśednoskowem zarědowanju „Open BTU“ w Sprjewinem kinje w Grodku 8. maja. Lěc by mógli se daś ZORJA transferěrowaś do grodkojskego regiona, wóstanjo na tom wjacoru wótwórjone. Wóno pak wupokažo móžnu perspektiwu na wuwiśe togo serbskego wokoło města, ako jo wjele serbskeje substance zgubiło pśez industrializaciju a brunicu. Kóńca wugla dla stoj Grodk źinsa wósebnje pśed wupominanjami strukturneje změny. Na to jo pokazał dr. Lutz Laschewski wót Serbskego instituta, kenž jo zarědowanje zgromadnje z Techniskeju uniwersitu BTU organizěrował. Serbska kultura a rěc stej pśemało wobglědanej ressource – tak tenor dalšnych pśednoskow. Gregor Kliem wót serbskego rozgłosa jo wó tom powědał, kótare impulse aktualna serbska muzikowa scena do kulturneje krajiny daś móžo. Rowno Grodk, kenž lažy na kšomje k Sakskej, by mógał wěcej profitěrowaś wót aktiwitow serbskich kupkow w Dolnej a Górnej Łužycy.