Z Barlinja/Berlin. 75. jubileja Zakładneje kazni a z tym załoženje Nimskeje zwězkoweje republiki respektiwnje 34 lět zakładna kazń w nowych zwězkowych krajach su zachadny kóńc tyźenja ze „Swěźenim demokratije“ a ze wšakimi zarědowanjami swěśili. Wobźělili su se na „Swěźenju demokratije“ mjeńšynowy sekretariat zgromaźe ze sekretariatom za dolnonimšćinu a ze źěłoweju zgromaźinu za nimske mjeńšyny europskego mjeńšynowego kšywowego zwězka FUEN a centralna rad Roma a Sinti w Nimskej. Wóni su pśi swójich stojnicach wó źěle towaristwow a wó mjeńšynach a rěcnych kupkach informěrowali. Ku tej góźbje su mjeńšyny teke na to pokazali, až Zakładna kazń až do togo njewobpśimjejo artikel za šćit a spěchowanje awtochtonych mjeńšynow. Tomu napśeśiwo su měli wustawa z Paulskeje cerkwje z lěta 1849, Weimarska wustawa z lěta 1919 a samo wustawje DDR z lětowu 1949 a 1968 taki artikel.