Zaźiwana som cytała wólbny program chóśebuskeje AfD, źož partaja źe cesto wuzwignjo, až serbske nałogi ako „wendische Fastnacht“ k „našej kulturje“ słušaju, ale weto njestoj žedno słowko wó serbskej rěcy. Ako som pisała na AfD, som na to pokazała, až serbska rěc słuša teke k našej serbskej kulturje, a som pšašała, co wóni kśě pśinosowaś k tomu, mócnje wobgrozonu rěc zdźaržaś. Pśedsedaŕ jo mjazy drugim to pisał: „Die wendische Sprache lebt durch die Menschen weiter, die sie sprechen. Die Politik kann hier nichts erzwingen.“ To jo źělnje pšawe. Politika njamóžo nam nic nanuzkaś, ale wěcej zajma, angažementa a wótwórjone wušy za naše problemy a śěžkosći by žycone a pomocniwe było.