Kóncak jo ten, ako bydli na kóńcu jsy. Końcakowe w Mósće su byli raz take. Ale jich syn Harald, ako jo se tam 19. maja lěta 1954 naroźił, njejo był žednje taki, ako jo se pśecej „na kóńcu“ pógibował. Nawopak! We swójom žywjenju jo za wětšy źěl prědku stojał. A to nic dla togo, dokulaž jo se wó to rył a dokulaž jo se kśěł jano wjelicaś, ale dla togo, dokulaž jo kśěł wjele cyniś głownje za to serbske, za serbsku rěc, kulturu a identitu.