Tśi žeńske su něnto za Serbski muzej zagronite: Martina Nowakojc z Wjerbna, Katharina Kliemowa a Christina Kliemowa z Děšna. Foto: Bernd Choritz

Gaž swěśimy něnto w nowšej historiji dolnołužyskego serbstwa wjelgin wažny jubilej – ga 30-lětne wobstaśe Serbskego muzeja na Młyńskej droze w Chóśebuzu –, pón su a buźo dalej k cytanjeju a słyšanjeju wjele, wjele rědnych a dobrych słowow. Pšawje tak, z połnym pšawom! Mjazy drugim take: Serbski muzej w Měsće jo jaden z nejwažnjejšych centrumow serbskego kulturnego a narodnego žywjenja w Dolnej Łužycy! Wón jo ta serbska institucija w Bramborskej, ako pśiwabijo nejwěcej woglědari z Łužyce, z drugich stron Nimskeje a teke z drugich krajow! Pśez pilne a zaměrne zběranje historiskich dokumentow a eksponatow a jich dokumentaciju, pśeslěźenje a prezentaciju jo Serbski muzej kompetentny komunikaciski centrum. Wjele, wjele wědy how jo! Serbska a nimska zjawnosć muzej respektěrujotej a k tomu pśinosujo, až se w luźach wubuźijo a zmócnijo serbske narodne sebjewědobnje, serbska identita.