Lěśojski cas kwiśo w nejrědnjejšych barwach. Młoge rostliny pśežywiju jano někotare dny we wazy abo tyźenje na lěchach. Ale dajo teke tšawy, kwětki a trajdu, kótarež móžoš derje sušyś. Wósebnje rědnje wuglědaju toś te wěcy ako wěnk za źurja.
Wjelgin lažko móžoš taki wěnašk wiś. Trjebaš za to: wěnk (ze słomy, gałuzkow abo pódobne), rostliny, kótarež teke sucho wuglědaju (n.p. lawendel, sćina/Schilf, wowołańc/Hasenklee, trajdu abo semjenjowe kapsle žydoweje brody/Jungfer im Grünen), drot, zagrodniske nožyce.
Gaž maš wšykno gromaźe, musyš se nejpjerwjej pśemysliś, kak dej wěnk wuglěda. Z idejku w głowje móžoš zachopiś wěnk wobwijaś. Za to gótujoš małke struski z rostlinskego materiala. Struski półožyjoš na wěnk a wobwijoš kijaški rostlinow a wěnk z drotom. Dłujke kijaški móžoš teke krotcyś. Musyš jano połojcu wěnka z rostlinami pókšyś, aby wěnk pózdźej derje na źurjach wisał. To gótujoš dowokoła, tak až njamóžoš drot a kijaški wiźeś. Na kóńcu wótstśigajoš drot a schowajoš kóńcyk na slěznem boku wěnka.