Z Budyšyna/Bautzen. Chóśebuski duo STOI & Janko jo lětosny rěd kulturnych lěśojskich zarědowanjow budyšyńskego towaristwa „Dźěłań dźeń“ wótwórił. Pó kickerowem turněru wó drugi „Rabatz Cup“ – pód toś tym mjenim nastawaju we źěłaŕnjach gósćinaŕskego towaristwa mjazy drugim wusokogódnotne, w manufakturje zgótowane rědy za blidowe balokopanje (kicker) – stej se starałej repaŕ a za beatboxing a loopy zagronity pozawnist dnja 13. julija za dobru mysl mjazy gósćimi. Jeju program jo mjazy drugim wobpśimjeł hit „Showbiz“ ako teke improwizaciju na pomjenjone wuběźowanje, kótarež jo STOI ako „echte competition“ zespominał. Wósebnje wjele aplawsa stej dostałej towarišnosć a konsum kritizěrujuce title ako „Pfandhunter“, kótarež mjazy drugim tematizěruju „zběranje flaškow ako zakład zasłužby“ a zekśěśe za „pyšnje śišćane papjerki“ ako „zmysł žywjenja“ satiriski wobswětlijo.