Z Turjeja/Tauer. Na prědnem kóńcu tyźenja w awgusće jo Turjej swój 45. kokot měł. Pśi nejrědnjejšem wjedrje su te stare a te młode, wjas a gmejna, wobydlarje a turisty zgromadnje swěśili. Te pśigótowanja za ten wjeliki swěźeń su južo jěsno se zachopili. Teke wobydlarje su pśed wjelikim swěźenjom swóje dwóry wupyšnili. Su pupki ze słomy baslili abo druge motiwy a do zagrody stajili, aby kuždemu a kuždej pokazali: Turjej co něco swěśiś! We jsy jo samo wuběźowanje było, chto jo se nejrědnjejšy motiw wumyslił. Dobyła jo Golnackojc familija. Na drugem městnje jo Sprengerojc familija a tśeśe městno jo Domšojc familija dojśpiła.