Z Noweje Niwy/Neu Zauche. Južo łoni jo musała nowoniwańska młoźina se stajiś wjedroju. To njedejało slědnu njeźelu, 4. awgusta, hynac byś. Zachopił jo se žnjowny swěźeń z namšu w cerkwi. (K tomu pór wěcej smužkow na boce 6.) Pó woglěźe cerkwje jo śěgnuło tych 21 młoźinskich pórow z dujaŕskeju muziku wót kapały „Spreewälder Jungs“ do gósćeńca „Zum Oberspreewald“. W swěźeńskem zalu stej gósći pówitałej młoźinskej šefowce Romy Lehmannojc a Carolin Kochojc. Serbske nagrono jo źaržał cłonk młoźiny Josi Verdienojc. Slědowała jo reja z bantami, kenž jo howacej wence pśed cerkwju se pokazała. Pótom su póriki hyšći rejowali rajnlendaŕ a Annemarju-polku wokoło bantatego boma.

Pór huśawki (Regenhuschen) su wótcakali pśed tym, až su se wupórali na sćernišćo (Stoppelacker). Slědkoju su se teke hyšći raz pśewoblekali. Źowća su wuměnili šorcu namšaŕskeje drastwy ze swěźeńskeju šorcu, carne crjeje z turnaŕskimi crjejami. Gólcy su se sunuli z carnego woblakowego zeca a se wobśěgnuli běły rejtaŕski zec.