Z Grodka/Spremberg. Glědajucy na lětosny program grodkojskego domowniskego swěźenja wunurijo se pśecej zasej pšašanje: Cogodla dajo jano mało serbskego? Wšak su byli case, w kótarychž su domowniski swěźeń pó oficialnem wótwórjenju na głownem jawišću wikowego naměsta z wjelikim serbskim kulturnym programom startowali, což jo pśecej 800 do 900 woglědarjow pśiwabiło. Głowny akter jo tencas był Grodkojski serbski swajźbaŕski pśeśěg, pódla su byli teke grodkojske gólańske gerce a serbske towaristwa z regiona ako gósći. Swajźbaŕski pśeśěg jo se mjaztym rozpušćił (Nowy Casnik jo w februarje wó tom rozpšawił), a dla togo stajijo se pšašanje, kak źo to dalej?

Pópšawem jo był wěcny wobłuk kultura w měsće Grodk na dobrej droze, samostatne serbske towaristwa, kulturne kupki a muzikowe kapały pśepšosyś, což jo se ako derje wupokazało, ale pśez koronu to njejo se jano pśetergnuło, ale jo se zewšym skóńcyło.