Z Dešna-Strjažowa/Dissen-Striesow. Z awtom Baltikum wuzgóniś a swóje granice wutestowaś. 25-lětny Christian Schmerl ze Strjažowa a 22-lětny Dešanaŕ Martin Hoffmann stej lětosa prědny raz se wobźěliłej na „Pothole Rodeo“. To wóznamjenijo teliko ako „depowy rodeo“ („Schlagloch Rodeo“) a glědajucy na kraje na pódzajtšu, njezda se ta asociacija womólna. Na ideju jo pśišeł Martin Hoffmann. „Som tencas wideo na Instagramje wiźeł wót luźi, ako su se na ,Pothole Rodeo‘ wobźělili. To som za zajmne měł a som mógał se derje pśedstajiś, teke sam se wobźěliś“, jo wón gronił. Christian Schmerl jo dodał: „Ideju smej pópšawem južo měłej za łońske lěśe, ale něco jo mjazy pśišło a pón jo za naju južo pśepózdźe z pśizjawjenim było.“ Ale dokulaž plan jo se zroźił a wobej stej se kšuśe za wobźělenje rozsuźiłej, stej južo łoni glědałej za se góźecym awtom. Pśeto: Dajo wěste pšawidło za to jězdźidło. Glědajucy na wšakorake wuběźowanja a tury musy jaden na wšakorake klase za awta źiwaś. Za njeju jo wažne było, až awto jo musało pak nanejmjenjej 20 lět stare byś, pak jo směło jano 500 euro płaśeś, ma jano 50 PS abo jo južo 500.