Z Města/Cottbus. Město Chóśebuz co wót šulskego lěta 2025/26 na Dolnoserbskem gymnaziumje w kuždem lětniku pśidatnu rědownju zarědowaś. To jo se rozsuźiło na zakłaźe prognoze šulskego amta a kraja, pó kótarejž buźo se wěcej wuknikow gymnazialne městno pominaś, ako stoj aktualnje k dispoziciji. Rownož jo Dolnoserbski gymnazium južo něnto z pominanjami wójował, jo šulski wjednik dr. Matthias Guttke spócetnje, solidarity dla, pśemyslował, jadnoraznje pśidatnu rědownju pśiwześ. A krotko pó tom jo se pokazało, až pśedwiźe plany šulskego amta a kraja trajuce rozšyrjenje licby rědownjow.

Šulska konferenca ma wobmyslenja, až mógł taki rozsud serbski profil gymnaziuma zesłabjeś. Maju na šuli južo něnto śěže, wšych wuknikow rěcnje na niwow pśinjasć, kenž jo za bilingualnu wucbu wót 8. lětnika trjebny. Njesměło pśez zawjeźenje pśidatneje rědownje w kuždem lětniku hyšći wěcej wuknikow ze snadnymi abo žednymi znaśami serbskeje rěcy pśiś. Tejerownosći by rumy za wucbu felowali.