Antje Lejnickowa (napšawo) jo pokazała, kak se wobleka swěźeńska drastwa, na co ma se źiwaś, a jo dała pomocniwe pokazki. 
Z Města/Cottbus. Gaž se zejdu nosaŕki serbskeje drastwy, jo něźi raz pśecej teke drastwa ta tema. „Som mógła hyś pó móju nowu kóšulu ku šlodaŕce, som dostała nowu šorcu, wušywam rowno cypjel abo sy ty wiźeła, co ta jadna jo slědny raz nosyła?“
Rowno tomu slědnemu aspektoju, co něchten nosy, su se wobšyrnje pśiwobrośili 12. oktobra w Serbskem muzeju w Chóśebuzu. Pód motom „Dresscode: Serbski!“ su se wótměli styri wšakorake workshopy. Organizěrowała a insceněrowała jo to Domowina, Dolnołužyska kulturna akademija, a spěchowała jo to Załožba za serbski lud.
Rěcna motiwatorka Iben Lotric jo pšašała wobźělnikow, co za nich wóznamjenijo nosenje drastwy, a co za nich njesłuša k drastwje. Zajmne rozgrona a dopóznaśa su se wukluwali.
