Z Města/Cottbus. „Wulicowanja wó wóźe“ su se 19. oktobra w połnem zalu chóśebuskego Komornego jawišća pokazali. Na 100 gósći jo se woglědało nowu inscenaciju Serbskego ludowego ansambla (SLA). Pśichwatał z Budyšyna jo teke Tomas Kreibich-Nawka, intendant SLA. Wón ga jo měł tu ideju za toś tu inscenaciju a toś jo wón pśed pśedstajenim woglědarjam rozkładował, kak jo k tomu pśišło.

Znaty serbski spisowaśel Jurij Brězan (1916–2006) běšo w lětach 1984–1988 pisał swóje kniglicki „Geschichten vom Wasser“ ze 16 krotkimi wulicowańkami. Toś te kniglicki jo napisał jano w nimskej rěcy, a wudali su je w nakładnistwje Neues Leben. „Toś te knigły su se mě wjelgin spódobali a smy w našom ansamblu z togo se wumyslili a pón teke zestajili wósebnu inscenaciju. Pśi tom smy něźi 50% z togo pśewzeli, což běšo Jurij Brězan napisał. Wšake smy pśidali, wósebnje ga to, co raz buźo we Łužycy pózdźej z wódu. Smy kśěli z tym pokazaś, kake wjelike problemy a wušparanja južo źinsa mamy z wódu a až buźo to pśecej górjej“, jo intendant gronił a pśi tom głownje na to pokazał, co ma to wšykno cyniś z wuglom.