Nawłos 31. oktobera pśed 90 lětami jo se w Drjenowje na Franojc byśu naroźiła Johanna Pontowa ako jadno ze šesć źiśi. Styri generacije su byli wšykne gromadu w domje žywe. Wóna se rada na źiśecy cas dopomina. A na to, až jo to grono było wšednje serbske. Wósebnje se mysli pśi tom na starku. Wót njeje jo Johanna wjele nawuknuła.

W šuli jo pak Johanna musała we wucbje nimski powědaś. Ale gaž jo była pśestawka abo šule kóńc, pón su źiśi serbske powědali. Casy kšajźu, dla tog až jo to było tencas zakazane. A teke, gaž su we jsy někogo pózmakali, su serbowali, wóna wulicujo. Na serbski jo se jězyk lěpjej wobraśał.

Johanna Pontowa jo se teke do serbskeje familije ženiła. Jeje muski Heinz Klinka jo teke ze serbskeju rěcu wótrosł. Jogo starka, mama, a wósebnje starki – te wšykne su z nim jano serbski powědali. Tak jo Heinz Klinka pózdźej na LPG z wejsanarjami rad serbował. A doma stej Johanna a Heinz se serbski rozgranjałej.