Dr. Hartmut Leipner jo w Košicach, na zmakanju słowjańskich mjeńšynow, swój referat w českej rěcy źaržał. Foto: Domowina/C. Škoda 
Z Košic/Słowakska. Federaliska unija europskich ludowych kupkow – FUEN – jo nejwětše zjadnośeństwo ludowych a etniskich mjeńšynow w Europje. 1949 bu wóna w Francojskej załožona, a mjaztym pśisłušaju jej wušej 100 organizacijow a zjadnośeństwo mjeńšynow ze 36 europskich krajow. Teke Domowina jo jej južo pśed wjele lětami pśistupiła a źěła w njej wjelgin aktiwnje sobu.
Wósebnje słowjańske mjeńšyny ze wšakich krajow su we FUEN z 33 organizacijami z 15 krajow mócnje zastupjone. Wóni su samo wutwórili swójo źěłowe zjadnośeństwo słowjańskich mjeńšynow. Jogo wjednik a powědaŕ jo z lěta 2023 Hartmut Leipner z Chóśebuza, zastupny pśedsedaŕ Domowiny.
