Z Lěd/Lehde. Pód motom „Dwa marka – jaden jězd z cołnom“ se wótmějo južo wót wóterych lět błośański gódowny mark, kenž jo jadnorazny: Chtož jo měł gluku, jaden tych góruco póžedanych tiketow za cołnowanje dostaś, jo mógał z cołnom mjazy markoma pendlowaś. Start jo na kuždem teju prědneju adwentskeju kóńcowu tyźenja pśecej wjeliki błośański pśistaw w Lubnjowje (Lübbenau), źož pśistawowy gódowny mark gósćoju južo młoge bitujo a jomu pomaga, cakański cas na cołn spódobnje pśemósćiś. Pó połgóźinskem cołnowanju se dojśpijo Muzej pód gołym njebjom na Lědach. Cełe grunty su byli ze słomu pókšyte, což jo dało ned śopłu atmosferu. Z budow a stojnicow, kótarež sy nadejšeł w bogatej licbje, jo stupiła lěbgodna wóń, sy słyšał gódownu muziku a how a tam wogeń praskotat wiźeł. Głownu wósebnosć togo błośańskego marka pak wucynijotej Janšojski bog a rumpodich. Bog jo wokoło chójźił a, z hajckanim witki na ramjenjach, mjelcecy nejlěpše žycenja pósrědnjał. Rumpodich abo ruprajcht jo rozdarił jabłuka a wórjechy.