Z Drjowka/Drebkau. Wałtoru, 26. nowembra, su se zmakali cłonki „serbskego koła“ Drjowk, zajmowane wobydlarje a regionalna powědaŕka Domowiny, Karin Tšukowa, aby se w muzeju Serbska tkajaŕska śpa wuměnili wó serbskich nastupnosćach města a wokoliny. Za tym, až jo Margitta Jurkowa, něgajšna pśigranjańska partnaŕka za serbske nastupnosći w Drjowku, na kradu zasłužony wuměńk šła, jo Doreen Hajašowa (Haiasch), wjednica muzeja Serbska tkajaŕska śpa Drjowk, toś tu funkciju pśewzeła a jo gósći ten wjacor wuwitała. Mimo oficielnego dnjownego pórěda jo dało drugu, zwjaselecu a spomnjeśa gódnu góźbu se zmakaś: Dr. Michaeloju Hajdanoju jo pśedsedaŕ Domowiny – Zwězk Łužyskich Serbow, Dawid Statnik, dnja 18. oktobra w Budyšynje pśepódał myto Domowiny. Aby pśibytnym wuznam cesćenja hyšći raz zwurazniła, jo Karin Tšukowa lawdaciju pśedcytała a Doreen Hajašowa jo se lawreatoju z kwětkowym darom źěkowała. Pótom su powědali wó terminach pśiducego lěta, pśi comž jo se moněrowało, jich by było pśemało. Dojadnali su se na tśi terminy za lěto, což pokažo wjeliki zajm Drjowkarjow za serbske temy.