Slědk glědaś na zachadne žywjeńske wótrězki – to jo to dobre pšawo jubilarow, wšojadno lěc pó dojśpiśu 50, 70 abo 90 žywjeńskich lět. Wósebnje rad se wołaju dopomnjeśa slědk, kótarež su rědne abo znanjece wót wuspěcha. Dopomnjeśa takeje kategorije dajo nadosć za roźonego Žylowarja Willija Gusora, kenž jo 30. decembra 2024 swój 90. narodny źeń swěśił.

Jubilar jo se južo rano w swójom žywjenju ze žywjenim, z nałogami a z rěcu serbskeje mjeńšyny zwězany cuł, dla cogož wón jo teke woglědał A-, B- a C-kurse za wuknjece serbskeje rěcy w Dešanku. Pózdźej jo se to wopokazało ako směr dawajucy rozsud. Južo, ako wón jo ako 26-lětny amt strjažojskego šołty pśiwzeł, su te rěcne znaśa jomu pomagali: „Wjelgin wažne jo było, až som se we wusokosći wócowu z luźimi w jich rěcy rozgranjaś mógał, až som jich spiwy a nałogi znał. Dokulaž wóni su, se wě, tak młodemu šołśe nejpjerwjej kradu skeptiski napśeśiwo stojali. Ale malsnje som mógał jich dowěru dobyś a w casu wót 1961 do 1965 někotare wěcy na drogu póraś“, dopomina se Willi Gusor.