Z Města/Cottbus. Sobotu 25. januara jo Kolektiw Wakuum pśedstajił njewšednu nowu interpretaciju tradicionelneje serbskeje ptaškoweje swajźby. Performatiwna inscenacija jo se pśedstajiła w dolno- a górnoserbskej rěcy, z nimskimi nadtitulami. Zarědowanje jo pśiwabiło wjele pśiglědaŕkow a pśiglědarjow do „Rosa“ do Wilhelm-Külzoweje drogi w Chóśebuzu.

Južo pśed oficialnym zachopjeńkom zeger 21:00 jo był taki nawal, až su musali luźam zastup zajźowaś. Publikum sam jo był źěl performance - wětšyna gósći jo se pokazała w z procu wugótowanych kostimach ako charaktery ptaškoweje swajźby. Pśez błyšćate pjera, wuměłske šnapace a pyšne woblaki jo se w rumnosći zgromaźiła magiska šwita ptaškow.

Organizatory su fleksibelnje reagěrowali na wjeliki nawal a su spontanje rozsuźili, performance hyšći drugi raz pokazaś. Z tym su teke gósći, ako su musali wence cakaś, měli šancu pśedstajenje dožywiś.