Smógorjow/Schmogrow. Stara jo ta tradicija zapusta w Smogorjowje – wjelgin stara. Jeje zachopjeńki śěgaju slědk wušej 150 lět. Pokazki za to su, až jo se zapust w małej błośańskej jsy južo w lěśe 1875 swěśił. Toś ta licba jo k wiźenjeju na slědnej stronje klambawy (ta spomina na na klinkotaty bom), kótaraž se njaso pśi smogorjojskem zapusće prědku. Klambawa jo stakim teke 150 lět stara. Na za nas nejstaršem zdźaržanem fośe młoźinskego zapusta z lěta 1913 jo to napisane. W srjejźi relikta namakajom notice restawrěrowanja, kótarež śěgaju slědk až do zachopjeńka 20. stolěśa. To jo pótom dalšna pokazka na to, až južo někotare generacije su toś ten nałog swěśili.

We toś tom lěśe smy južo dla togo wósebny 150. zapust swěśili. K tomu su Smogorjowarje za prědny kóńc tyźenja we februarje pśepšosyli. Ale južo stwórtk togo tyźenja jo se zachopił zapustojski ruš w Smogorjowje. Młoźinski šef Tom Siegert jo pśepšosył na spiwańske zwucowanje.