Fabienne Belkojc (napšawo) a Madleen Drewenstättojc nawjedujotej kósobusku młoźinu.

Z Kósobuza/Kunersdorf. Chtož w Kósobuzu zapustojski pśeśěg sobu gótujo abo ako pśiglědaŕ sobu chójźi, ten musy měś napšawdu dobrej a strowej noze. Něźi pěś do šesć kilomejtarjow dłujka ga jo tam ta zapustojska droga! Nejpjerwjej wót doma wognjoweje wobory na droze do Dalica až k športnišćoju, pón zasej slědk až k najsy, źož ma bus swóju staciju, a dalej ku tym slědnym domam na Droze měra. Pón zasej slědk mimo gata až k droze do Górneje (Milkersdorf), pón mimo dwórnišća (pśi bonje), k wejsnemu źěloju pśi Lěsnej droze (Waldstraße). A na kóńcu zasej slědk do jsy na zapustojsku reju.