Z Dešna/Dissen. Februar jo tak malsnje wótejšeł, ak jo pśišeł, ale weto smy teke we toś tom mjasecu wjele dožywili a nawuknuli. Tak wjele njejsmy wuleśeli, ale ten jaden abo drugi docent jo ga měł teke dowol, kaž teke někotare wót našych Zorjakow. Zaběrali smy se z temami zyma a zapust. Pla Gregora pak móžo se staś, až wótchadamy wót spócetneje temy, za to ale wopóznajomy cele nowe słowa.

Nejwětšy špos smy měli, ak smy dejali se 12 wulicowańkow wumysliś. Kuždy jo musał nanejmjenjej jadnu sadu ku kuždemu wulicowańkoju napisaś a tak su nastali rědne, kreatiwne a njewšedne wulicowańka. Ako toś ten nowy impuls, jo dało teke nowe graśe k słyšanjeju a rozměśeju a póznaśeju. „Suk wandrujo k tomu, kótaryž...“. Pśez to smy mógli sami pśespytowaś, co smy rozměli a smy teke něco wuknuli wó drugich.