Z Města/Cottbus. W ramiku Serbskego blida su dolnoserbske awtorki wurězki ze swójich esejow cytali, kótarež su se wózjawili w knigłach „Serbstwo, quo vadis?“ wót Ludowego nakładnistwa Domowina. Zestajiła jo knigły Marka Maćijowa, něgajšna jadnaŕka LND, a pśepšosyła do Serbskego muzeja, srjodu, 5. měrca, jo kuratorka Christina Kliemowa. We knigłach zwuraznijo 19 awtorkow a awtorow z Dolneje a Górneje Łužyce swóje mysli k pšašanjeju „Serbstwo, quo vadis?“ (Serbstwo, źo pójźoš?), rozmjej wó stawje a pśichoźe serbskeje towarišnosći. Styri eseje su z pjera dolnoserbskich awtorkow.