Z Města/Cottbus. Kužde šulske lěto zmakaju se dwa raza serbske ceptaŕki, ako wuwucuju w šulach w Chóśebuzu a w dalšnych městach a jsach w Dolnej Łužycy dolnoserbsku rěc, k swójej fachowej konferency. Ta druga w šulskem lěśe 2024/25 jo se wótměła slědny tyźeń srjodu, a tak ako pśecej su se zmakali w Dolnoserbskem internaśe.

Madeline Gjarźic ze Strjažowa, wjednica zakładneje šule „Lutki“ w Žylowje, ako nawjedujo tu konferencu, jo wuwitała ceptaŕki z jadnasćo šulow, ako wuwucuju dolnoserbsku rěc we B-wucbje a we bilingualnej witaj-wucbje. To wuwitanje jo płaśiło teke za Bernda Melchera, wjednika Rěcnego centruma WITAJ (RCW) w Chóśebuzu, za Anu Kosacojc-Kozelowu, zagronitu za serbske nastupnosći w Měsće, za Wernera Měškanka, dłujkolětnego kuratora w Serbskem muzeju, a za Horsta Adama, pśedsedarja towaristwa „Serbske koparje“.