Z Bělina/Byhlen. Pśi prědnem zmakanju za tekstilne rucnikaŕstwo w Gołbinje – we łońskem nazymje – su se zeznali wjednica kursa Lizka Wimmerowa a wobźělnice Stefanie Dirlackowa a Marlen Splittowa. Wobej žeńskej chójźitej pšawidłownje na priwatnu pśězu w Bórkowach. Južo dłujko stej se zajmowałej za šyśe šorcow a bluzow. Dotychměst pak njejstej nikogo namakałej, kenž jo kśěł jim to pokazaś respektiwnje, kenž by měł za to cas. Pśi prědnem workshopje, w kótaremž jo jano šorca we fokusu stojała, jo nastało žycenje, až dajo dalšny workshop za serbsku bluzu. Wjele wobźělnicow z prědnego workshopa jo južo zgótowało swójske šorce. „Rozpokazanje (Anleitung) jo było tak dobre, až sy to sama dalej wužywaś mógała“, se wjaseli Stefanie Dirlackowa. Z tym jo wordował zgromadny wejsański dom w Bělinje 1. a 2. měrca zasej šyjarna źěłaŕnja. Za bluzowy workshop jo Lizka Wimmerowa dwa dnja zaplanowała. Na prědnem dnju jo se tych 12 wobźělnicow, ako jo pśišło ze Tšupca, Bórkow, Wótšowca (Bischdorf), Bělina a Janšojc, z teoriju zaběrało.