Ze Kśišowa/Krieschow. Cas zapusta jo wósebny wótrězk lěta, na kótaryž se sobustatkujuce a teke pśiglědaŕki a pśiglědarje wjasele. Wótběg jo kužde lěto ten samski, wšak jo kužde jadnotliwe zarědowanje jadnorazne a njezabytne. Tak teke 2025, źož jo se w Kśišowje zasej na styri kóńcach tyźenjow swěśiło. Startowali su se te wjasołe dny hyšći ze suroweju zymu, ale skóńcyła jo se ten fantastiski cas sobotu, 8. měrca, ze słyńckowatym a śopłym nalětnym dnjom!

Zachopk zapustowego casa su wugótowali te pyšnje pśegótowane młode wóstanjone, a to dnja 15. februara. Wjasele jo ta šwita pó jsy maršěrowała a njejo se pśi tom móliś dała daniž wót zymnych temperaturow daniž wót sněga. Su rejowali, spiwali a teke jaden abo drugi paleńc tutkali. We tom ramiku su se teke wjelike a małe nowe Kśišowarje a Kśišowaŕki pówitali. Tradicionelnje su se nowo wugótowane domy pśi camprowanju „zaduwali“. Wjele familijow jo se łoni za Kśišow ako nowu domownju rozsuźiło. Aby k wšyknym nowackam woglědali, su camprowarje a kapała kradu dłujko ducy byli.