Z Města/Cottbus. W nazymje 2023 jo se zachopił nowy kurs dolnoserbskeje rěcy wót stawa A2 k wušemu stawoju B1 za źiśownice a hortnaŕki, kótarež su do togo južo dojśpili niwow A2 w Šuli za dolnoserbsku rěc a kulturu. Wěcej ako połtera lěta jo něnto mimo – to jo radny kus casa a se wě to njejo za wobźělnice lažka droga była. To jo južo na tom wiźeś, až z kursom jo jich zachopiło 6, do kóńca pak su pón wutrali jano 3 žeńske. Wóni su w toś tom casu 539 wucbnych góźinow dostali, to wucynijo dogromady 77 dnjow a dogromady licone 3,5 mjasecow.

Dalejkubłanja w serbskej rěcy za wótkubłaŕki, kótarež su nastali na zakłaźe iniciatiwy wokrejsa Sprjewja-Nysa (SPN) a wósebnje z pomocu zagroniteju za serbske nastupnosći Kerstin Kosakoweje a jeje naslědnice Romy Ruffoweje, su se pśez pěś lět wót wokrejsa SPN financnje spěchowali a zgromadnje ze Serbskeju rěcneju šulu organizěrowali.