Z Města/Cottbus. Titel rejowaŕskego wjacora „Smy! – Bin ich?“ jo se derje góźeł ako moto cełego wjacora. W derje połnjonem Piccolo-źiwadle jo kus wjele woglědarjow kradu gnuł a zaběrał. Dnja 5. měrca jo pśedstajił Serbski ludowy ansambel toś tu nowu produkciju w Chóśebuzu.

Licha choreografowka Gundula Peuthert a jeje asistenka Berit Schiedlo stej wužywałej inowatiwnu wašnju za ten rejowaŕski kus. Wažnu rolu ga maju luźe, kenž su wulicowali w interviewach, co maju cyniś z tym serbskim. A jich póśěgi z tym serbskim su kradu rozdźělne. Někotare powědaju běžnje serbski, druge wulicuju, až maju wjele kontakta, ale ako Serb(owka) se njecuju. Powědałej stej z luźimi z Dolneje, srjejźneje a Górneje Łužyce. Někotare z nich su z krejza lajskich rejowaŕskich kupkow. Reprezentěrowane su wšykne starstwowe kupki.