Chóśebuz/Cottbus. Ako južo wjele lět, jo póbitowała Šula za dolnoserbsku rěc a kulturu w lěśu zasej tyźeński kurs, NC jo wó tom rozpšawił (NC 31 wót 3. awgusta).

Něnt jo Casnik zgónił, až jo we tom tyźenju jo było rownocasnje rěcne dalejkubłanje za ceptarki a wótkubłarki. Južo druge lěto jo se take něco póbitowało Źěłanišćo za kubłańske wuwijanje Chóśebuz (ABC) w kooperaciji z Rěcneju šulu. Na wótpołdnjach jo ABC organizěrowało program w serbskej rěcy. Wobźěliło jo se sedym ceptarkow a drugich wobźělnikow tyźeńskego kursa Rěcneje šule. Rěcna šula póbitujo na dopołdnjach rěcne kurse, wótpołdnja wopóznawaju se kursisty ze serbskim žywjenim, jo wjednica ABC dr. Christiana Piniekowa Casnikoju k wěsći dała. Paralelnje k tomu organizěrujo ABC pedagogiski wusměrjony program w serbskej rěcy. Teke wótkubłarka, kenž jo dopołdnja źěłała a njejo se mógała na rěcnem kursu wobźěliś, jo weto wótpołdnja pśišła.