Dešańska młoźina jo była taka luba a pśijazna, až jo swój tradicionelny temin za łapanje kokota lětosa wótstarcyła. A to wót 21. awgusta na 4. september. To su cynili, aby mógali se wobźěliś na wjelikem Serbskem swěźenju w Janšojcach, źož su we swěźeńskem pśeśěgu pśedstajili wšake rědne serbske tradicije. Za to słuša tym młodym, za wětšy źěl Domowinskim cłonkam, w Dešnje hyšći raz wutšobny źěk a pśipóznaśe.

Na kokośe w Dešnje pak smy teke słyšali hynakše głose. Matias Glodny jo se na to domyslił, až běchu pśed něźi 15 lětami južo raz pśestarcyli swój kšuty termin za kokot, někakego drugego wažnego swěźenja dla. A co su dostali ako źěk? Špatne, wjelgin špatne wjedro! A tak jo se to teke lětosa stało. 21. awgusta by měli nejlěpše kokotowe wjedro, 4. septembra, pak jo se padało skóro ceły cas. Nic mócnje, ale chrapka pó chrapce. Akle pón, gaž su měli krale swóje kralowki wuzwólone, jo słyńcko zasej glědało na Dešno.