Pśed tśimi tyźenjami (NC 34/2016) smy pisali wót hochoskego łoźownika Wolfganga Lotry (Lottra), kótaryž jězdźi na drogowarskej łoźi AIDA pó mórjach a oceanach cełego swěta. Něnto smy zgónili, až ten Casnik jo gano na tu łoź doleśeł. „Wina“ na tom stej Duric Fryco a Gabi z Hochoze; Gabi Duric źěła w hochoskej źiśowni Tyca, źož ma serbsku Witaj-kupku na starosći. „Rowno na tom dnju, ako smej se gótowałej na našo krotke drogowanje z łoźu, jo ten Casnik lažał w postowem kašćiku“, jo nam Gabi wulicowała. Wónej stej jen zatkałej sobu do kofera a jěłej do města Warnemünde, źož su stupiłej na łoź (Schiff) AIDA, kótaraž jo jeju wuwjadła na styri dny do Dańskeje a do Šwedojskeje. A to jo rowno ta turistiska łoź, źož „Lotti“ kuždy źeń swóju słužbu cyni. Wjelgin wjelike jo było to wjasele togo hochoskego łoźownika, ako jo wóne wudaśe Casnika we rukoma źaržał! A wón jo ned pšosył Duric manźelskeju, aby wšyknym źěk wugroniłej: tomu pisarju Georgoju Zielonkowskemu a tej redakciji za to, až ten artikel jo se tak rědnje wótśišćał. Pśipódla gronjone: Łoźownik Lotra glěda rad do njogo, gaž jo doma na urlopje.