Žnjowne krale Dolneje Łužyce a jich kralowki su se zestupali k zgromadnej fotografiji na Bramic łuce. Z nimi: šef dolnołužyskego běrowa Domowiny Marcus Końcaŕ (srjejźa), zagronity za serbske nastupnosći we wokrejsu Damna-Błota Dieter Freihoff, zastupny landrot Chris Halecker a direktor amta Luboraz–Górne Błota Bernd Bośan. 
Běła Góra/Byhleguhre. Tudy su sobotu tyźeń swěśili superkokot. 17 žnjownych kralow ze wšyknych rogow serbskeje Dolneje Łužyce – wót Kózlego pla Drjowka až do Noweje Niwy pla Lubina – jo se wuběgowało wó cesć superkrala, togo krala tych kralow. Tu samu jo sebje wuwójował jaden mjaztym znaty młoźeńc z Běłeje Góry: to jo 29lětny Rico Nowak (Noack), ten samy, kótaryž jo južo łoni na superkokośe w Žylowje superkral wordował.
To dobyśe drugi raz zasobu groni, až Běła Góra buźo teke za lěto zasej superkokot organizěrowaś. To buźo južo ten stwórty raz w Běłej Górje, wót tych dotychměst 17 superkokotow! Jo to zlě abo derje? „Mě njejo nicht pšosył, až dejm se ekstra mjenjej staraś a drugim daś dobyś“, jo Rico na našo pšašanje wótegronił. „To jo drje źěło, ale pśez to, až Domowina nas pśi tom mócnje pódpěra, njejo naša młoźina pśeliš wobśěžkana“. How pak se zda, až měnjenja su wšake. Nam jo do wušowu teke zdychowanje zazněło: „O ně, južo zasej my!“
