Pratyja za 2017 jo wuśišćana. A dokulaž ta wjas, kótaraž za pśiduce lěto w srjejźišću stoj, Góry su, jo tam była teke prezentacija našogo dolnoserbskego kalendarja. 30. septembra jo se zmakało dla togo w gmejnskem domje, něgajšnem sportarskem domje, pśisamen 25 luźi.

Šefredaktor Horst Adam jo nejpjerwjej tšošku nerwozny był. Śpa jo krotko do zachopjeńka hyšći dosć prozna była. Pśiźo ga dosć luźi? Na tom samem dnju jo było we tej jsy zakopowanje, lěc luźe pśidu pótom na premjeru Pratyje?

Ale su pśišli. Nic wšykne wót zakopowanja, ale za to teke z wokolnych jsow a samo młode pśisłucharje. Tak jo se tam zejšła měšańca luźi, wšykne wejsańske, wšykne ze zajmom za to serbske a stawizny Gór.