Chóśebuz/Cottbus. Wót 30. septembra jo łužyska brunicowa industrija pśedana. Koncern Energetický a průmyslový holding (EPH) jo kupił zgromadnje ze swójim financnym partnarjom PPF Investments Ltd. (PPFI) wót Vattenfalla wše łužyske brunicowe jamy a milinarnje. 11. oktobra buźo se nowe pśedsedarstwo wuzwólowaś, jo dał EPH w interneśe k wěsći. Česki koncern z głownym sedłom w Praze jo znate cynił, až buźo głowny kwartěr za łužysku brunicu nadalej w Chóśebuzu, z tymi samymi sobuźěłaśerjami kaž doněnta. Jich jo wokoło 8.000 luźi, pišo EPH. Nowy wobsejźaŕ jo tarifowe dogrono pśiwzeł a wupowěźenja wuzamknuł až do 2020.

Regionalne partnarje cakaju na to, až mógu z nowym koncernom zasej gromadu źěłaś. Teke Domowina jo nam k wěsći dała, až procuju se wó termin z EPH. Tuchylu pak pśigótuju hyšći slědne lětne rozgrono z Vattenfallom w nowemberje. Což nastupa spěchowanje, jo casnikarska powědarka Domowiny Borbora Felberowa pisała: „To su dary, wězane na Vattenfall. Co nowy mějaŕ buźo dariś, jo jogo rozsud. Rědnje by było, gaby EPH se rowno tak angažěrował kaž Vattenfall“.