Na swójom pósejźenju slědny tyźeń wałtoru w Serbskem domje su cłonki župnego pśedsedarstwa wuwitali wósebnego gósća. Jo to był Jan Budar, wót 1. oktobra nowy direktor Załožby za serbski lud. Jogo jo župa pśepšosyła do Chóśebuza, aby se how pśedstajił a znate cynił swóje mysli wó dalšnem źěle serbskeje załožby.

Jan Budaŕ jo to rad cynił, jo wopisował swójo doněntejšne žywjenje we Serbach a zwenka nich, w kótaremž jo grało to serbske pśecej wjeliku rolu. Powědał jo wó swójich idejach a wizijach w źěle serbskeje załožby. Wjelgin wažne jo za njogo, až budu cełe źěło załožby a wuslědki togo wěcej transparentne. Luźe deje wěźeś, co my źěłamy a dla cogo se tak abo hynac rozsuźijomy, za co se pjenjeze załožby wužywaju. Wón njoco źěliś Dolnu a Górnu Łužycu, ale pśi wšych rozsuźenjach glědaś na wósebnu situaciju w Bramborskej, jo wustajił. Drugi taki wjelgin wažny nadawk jo za njogo a za załožbu, až se serbska rěc zjawi lěpjej a šyršej w modernych medijach.