Pśez to, až personal w źiśecych zagrodkach se něnto lěpjej zapłaśijo a až licba źiśi w Kita pśisamem wšuźi dalej rosćo, trjebaju komuny za financěrowanje swójich Kita wěcej pjenjez ako su byli dotychměst planowane. To płaśi tež za wokrejs SPN, a togodla jo wokrejsny sejm na swójom pósejźenju kóńc septembra wobzamknuł pśidatne pjenjeze. Za lětosa su to 2,4 mio euro, to groni za kužde góle 240 euro. Z tym wudajo wokrejs lětosa za wob-zwarnowanje źiśi w źiśecych zagrodkach pśisamem 27 mio. euro. W lěśe 2017 budu toś te wudawki dalej stupaś, to groni wó 130 euro za kužde źowćko a kuždego gólcyka.

Grodk musy za biblioteku mjenjej płaśiś

Wokrejs SPN ma južo wjele lět swójsku biblioteku, a to w Grodku w tamnem groźe. Wušej 42.000 wšakich knigłow a kniglickow, casopisow, filmow, CDejow a druge medije tam maju, teke žedne w serbskej rěcy. Zajm za nje jo wjeliki, pśisamem 3000 dorosćonych, młodostnych a źiśi se tam pšawidłownje něco wupóžycujo za cytanje, glědanje a słuchanje. Łoni jo se to wušej 100.000 raz stało!