Wjasele Strjažowarjow jo wjelike. Pśed styri lětami su wobsejźarje tamny gósćeńc zacynili. Wót togo casa su zapustarje z busom do Dešna jězdźili na reje. A wejsny gósćeńc jo teke za młogu drugu góźbu felował.

Na gluku jo se něchten pśinamakał, kótaryž njejo jano ten póstary dom wót kóńca 19. stolěśa kupił, ale ma teke ambicije ako gósćeńcaŕ. 47lětny Andreas Blumrodt pópšawem njejo Strjažowaŕ a teke njama nic ze Strjažowom cyniś. Wón ma w Chóśebuzu blidarnju. A jo měł pśed někotarymi lětami južo kjarcmu w Chóśebuzu. Pśipadnje jo starcył na póbitowanje žarjabnice. Strjažojska kjarcma jo jomu ale pśedroga była za te stare twarjenja a kak jo tam wuglědało. Pótom pak jo wobsejźarka hyšći raz pla njogo zazwóniła, dokulaž jo kśěła drugemu zajmcoju ten ekspozej za to twarjenje pśipósłaś, ale Andreas Blumrodt jo ten ekspozej hyšći měł. Pśi tej góźbje jo wón se pšašał, lěc hyšći tak wjele pjenjez pominaju. A dla togo, až jo było mjenjej pjenjez, jo ten chóśebuski blidaŕ tu góźbu pópadnuł.