Slěpe/Schleife. Nowy energijowy koncern LEAG (pśiducnik Vattenfalla w Łužycy, załožony wót českego koncerna EPH a jogo financnego partnarja PPF Investments) njejo hyšći wobzamknuł, lěc budu nowe wuglowe jamy pótrjebaś. Wóni kśě to wobzamknjenje kradu wótwažyś a wobmysliś a pótrjebaju za to cas. To jo gronił wjednik wótźělenja za rekultiwěrowanje a pśesedlenja pla LEAG Thomas Penk wałtoru tyźeń na wobradowanju gmejnskeje rady. „My wjeźomy intensiwne rozgrona a pśespytujomy wšo. My se naźejomy, až buźomy za pór tyźeni móc wobzamknuś, kak dalej“. Wón jo wuzwignuł, až naslědku buźo to wobzamknjenje wót politiskich, energetiskich a góspodarskich wuměnjenjow (Bedingungen) wótwisne.

Zastupniki nowego wobsednikarja łužyskich elektrarnjow su doněnta dwě rozgronowej runźe wjadli: raz z landrotami a wušym šołtu Chóśebuza a raz ze šołtami gmejnow, kótarymž grozy wótbagrowanje. „Koncern EPH co se na dlejšy cas w Łužycy angažěrowaś“, jo slěpjański šołta Reinhard Bork suźił. „Managementowe struktury jo LEAG wót Vattenfalla pśewzeł“, jo wón gmejnskej raźe powěźeł.