Wjas bźeze gósćeńca, to nic njejo. To su kradu zacuwali Strajžowarje, źož jo ten gósćeńc pěś lět zacynjony był. We wjele jsach muse na dłujki cas z tym žywe byś, ale Strjažowarje su měli gluku. Blidarski mejstaŕ z Města Andreas Blumrodt jo ten wušej 100 lět stary kompleks twarjenjow kupił (w NC 42 wót 19. oktobra smy wó tom rozpšawili).

Wšake jo musał tam do rěcha spóraś, a wšake źěło jomu hyšći wóstanjo. W casu europskego mejstarstwa w balokopanju jo južo wótcynił renowěrowanu kjarcmarsku śpu za zgromadne glědanje balokopanja w telewizorje. A Andreas Blumrodt, kótaryž jo měł južo w Chóśebuzu młogi gósćeńc, mjazy drugim kafejownju w Serbskem domje, jo był spokojom z pśiwześim nowego gósćeńca. Strjažowarje a druge su pśišli a kuždy źeń jo była rědna gromada.

Na taki part su Strjažowarje a nowy wobsejźaŕ gósćeńca se spóznali a su do rozgrona pśišli. „Smy kśěli hyšći lětosa měś wětše zarědowanje w gósćeńcu“, jo Casnikoju wulicował Frank Rybak, pśedsedaŕ domowniskego towaristwa. Tak su se dojadnali na kjarmušnu reju a tak jo se stało 22. oktobra.