Na literarnej kjarmušy: (wót lěwego boka) Jurij Koch, jadnarka nakładnistwa Domowina Marka Maćijowa, źowka fararja Herberta Nowaka dr. Madlena Norbergowa, dr. Fryco Libo a nawjedujuca lektorka nakładnistwa Janka Pěčkojc de Lévano. 
Drjenow/Drehnow. Ludowe nakładnistwo Domowina jo lětosa wudało tšoje knigły a jadnu CDeju k słuchanju w dolnoserbskej rěcy abo z kradu dolnoserbskeju tematiku. Njeźelu tyźeń wótpołdnja su kazali lubowarjam serbskego pisanego słowa do kjarcmy Jagarski dwór na literarnu kjarmušu – tradicionelnu spódobnu gósćinu ze zjawnym lazownim z nowych knigłow. Gósći su pśi kafeju, skibkach a mazańcu słuchali na fragmenty wónych publikacijow, pśednjasone wětšy źěl wót awtorow. Wó dobru mysl a wótměnjenje jo se starała kapała Kula bula ze spiwarjom Geraldom Schönom.
Sonntag, 20.04.2025
