Škódow/Skadow. Nawłos wósym mjasecow jo firma STRABAG AG z města twariła tudy nowy móst pśez rěku k Rogoznu. Pśedslědny pětk su tu nowu twaŕ oficielnje wuswěśili. 1.265.000 euro z programa pśez wusoku wódu su nagromadu wudali. To jo było trjeba, pśeto ten stary drjewjany móst z lěta 1973 jo pśišeł 2013 do škódy pśi wusokej wóźe. Jano hyšći kólasarje a pěškarje su směli pśez njen jězdźiś a chójźiś, awta nic. Ten brašny móst buźo se něnto wóttergaś, ale wěsće njebuźo nicht tužny dla togo.

Nowy Casnik: Pśi wuswěśenju nowego mosta sćo byli pódla, a to w rědnej serbskej drastwje. Co sćo se myslili, ako ten bant jo wordował pśerězany?

Helga Hammerowa: Mě jo wordowało zrazom lažko wokoło wutšoby. Něnto, pó telik mjasecach, jo zasej gromaźe, což gromadu słuša. K tym wutwarjonym dwóram w góli ga smy mógali jano z kólasom abo pěšy pśiś. Z awtom sy musał wjelgin nawokoło jěś. Ja sama bydlim wence pśi Škódojskej Łucnej droze a ja wěm, wót cogož powědam.

Młogi jo se akle źinsa dopomnjeł, až za rěku su dwóry, ako słušaju do Škódowa...