Mjasece dłujko južo wójuju wó nowe póstajenje za serbske šulstwo (Verordnung über die schulischen Bildungsangelegenheiten der Sorben/Wenden, SWSchulV). Kubłańske ministarstwo (MBJS) jo kśěło to póstajenje nejpjerwjej samo wugótowaś. Serbska rada a serbske fachniki su se pak wuwójowali, až mógu sami nanejmjenjej swójo měnjenje groniś. Wótgłosowaś pak njamógu. Zastojnica w MBJS Katrin Düring jo k wěsći dała, dla cogo su trjebali taki dłujki cas za wobźěłanje nacerjenja. Jurist w jich domje jo kśěł wjele změniś a to wšo su tam zatwarili. Bóžko pak, tak su Serby kšajźicku gronili, su we tom wšykno to, což su Serby sebje wuwójowali, zasej wen brali. Dr. Düring jo pśilubiła, až budu na pósejźenju w januarje wó tom powědaś, wóna co pak teke na tom dnju wótgłosowaś a tu wěc wobzamknuś. Groniła jo, až pśemysluju Serbam napśeśiwo pśiś w pšašanju minimalneje licby wuknikow. Tuchylu lažy granica za wšym zdaśim pla dwanasćo wuknikow. Serby kśě tu licbu měś tak małku ako móžno, dokulaž njamógu kurse nastaś, gaž ta licba njejo dopołnjona.