Bremen. Z njeměrujucu powěsć smy dostali z Bremena. Tam źěła institut za dolnonimsku rěc (pó ludowem: plattdeutsch). Wóni wuźěłaju słowniki, staraju se wó tu rěc a wuslěźiju, wjele powědarjow maju a co wóni trjebaju.

W maju 2016 pak su wobzamknuli kněžarstwa krajow Bremen, Dolnosakska, Hamburg a Šleswig-Holštejnska, až njekśě ten institut wót lěta 2018 dalej financěrowaś. Jadna se wó pśisamem 300.000 euro. To by był faktiski kóńc teje institucije, kótaraž dostanjo dwě tśeśinje swójogo etata pśez spěchowanje krajow. Krajne kněžarstwa zašćituju swój rozsud z tym, až njekśě žariś na kosty dolnonimskeje rěcy. Kśě te pjenjeze jano na hynakšy part za tu rěc wudaś.

Institut sam groni, až su južo 40 lět centrala za dolnonimsku rěc. Tam se zgromaźiju a dalej dawaju informacije k toś tej rěcy, mjazy drugim maju nejžwětšu biblioteku teje rěcy.