Kuždu tśeśu sobotu w mjasecu wusćeła telewizija rbb serbski magacin „Łužyca“. A to južo wjele lět, dogromady buźo jich w pśiducem aprylu 25 lět. Team luźi, kótaryž wugótujo ten magacin, jo se južo dlej žycył, až „Łužyca“ dostanjo nowy design. A to jo se něnto stało!

Zagronity za telewizijne magaciny w chóśebuskem studiju rbb jo Hellmuth Henneberg. Wón ma ale cełe lěto 2016 dowol a jo swójomu zastupnikoju Dirkoju Schneideroju na drogu dał, až redakcija „Łužyce“ sebje take pśeměnjenje žycy. Tak jo amtěrujucy wjednik redakcije kontakt nawězał ze zagronitym wótźělenim za prezentaciju a design programa. Wóni su to rowno tak wiźeli a toś su sebje stajili nadawk, až kśě lětosa take něco zwónoźeś. Stare wuglědanje „Łužyce“ jo w lěśe 2008 nastało.

Wěcej razow su se pótom „Łužycynarje“ z designerami rbb zmakali. Su se „jano“ rozgranjali, ale designerje su kradu derje pśisłuchali, jo Dirk Schneider ze źinsajšnego wiźenja ten proces zespominał. Wóni su derje rozměli, co su te luźe wót serbskego magacina sebje žycyli. A co jo to było?