Sportowa kólasarka Trixi Worakojc a jeje něgajšny trenaŕ Eberhard Pöschke stej na woklapnicy pódariłej gmejenje historiske kólaso. 
Dešno/Dissen. Licba wobydlari we jsy jo łoni spadnuła wót 637 na 613 (-24!), a nic jadno góle njejo se tudy naroźiło! Stakim su luźe se hyšći słabjej płoźili nježli dešańske bóśony, kótarymž jo se we tom suchem lěśe tak a tak wjelgickano ryjnje zejšło. Rozmjej: dla suše stej jano dwa młodej bóśona lěśe pśežywiłej a do Afriki wuleśełej. To jo wulicował šołta Fred Kaiser na woklapnicy pětk wjacor w zalu Serbskego dwóra tym jadnab 120 zgromaźonym wobydlarjam.
12 wobydlari Dešna jo wumrěło, 19 su wuśěgnuli – na drugem boce su jano sedymjo do Dešna pśiśěgnuli. Licba wobydlari cełeje dešańsko-strjažojskeje gmejny jo pśez to spadnuła prědny raz pód 1.000: wót 1010 na 996 – jo šołta we swójej rozpšawje (Bericht) gronił.
