Pśedsedarstwo Towaristwa serbskich błośańskich rybakarjow Bórkowy a wokolina na głownej zgromaźinje w Hochozy, mjazy nimi pśedsedaŕ Siegmund Lehmann (drugi wótlěwa) a wjednik zgromaźiny Fryco Wojto (z mikrofonom). Napšawo: Župan dolnołužyskeje Domowiny Harald Końcak ako gósć. 
Hochoza/Drachhausen. Łoni su serbske rybakarje wjelgin ryjne lěto měli, a dla dłujkeje suše w lěśu a niskeje wódy su jano mało rybow nałojli. Dla tog jo pśedsedarstwo nakupiło wjele wěcej „rybjecego sajźonka“ nježli we zachadnych lětach. Rozmjej, nagromadu su 6.974 kg młodych rybow nasajźali. To jo pśisamem tśi raz wěcej ako lěto pjerwjej! Pušćanje rybow do wódy – to jo była ta wažnjejša nastupnosć na głownej zgromaźinje Towaristwa serbskich rybakarjow Bórkowy a wokolina sobotu tyźeń w Złośanem plonje.
Pógóršenje dla sajźanja rybow do rěki
Źož mało rybow jo, tam deje kradu na to glědaś, źo ryby worduju do rěki sajźane – to su rybakarje z Dešna sebje łoni w lisće na pśedsedarstwo pominali. Wóni maju swój rewěr pśi Małksy a Góramśicy, we wódach, źož to rybow-łojenje jo wjelgin snadnje wupadnuło. To jo wulicował na zgromaźinje pśedsedaŕ Siegmund Lehmann z Bórkow.
